ލޮނު ބޯކިބާ، ރިހާކުރު ބޯކިބާ ނުވަތަ އަޅި ބޯކިބަލަކީ ދިވެހިންގެ ސުފުރާމަތިން މަގުބޫލުކަން ހޯދާފައިވާ ކުޅި ބޯކިބަލުގެ އާއިލާއަށް ނިސްބަތްވާ ބޯކިބަލުގެ ވައްތަރު ތަކެކެވެ. ތައްޔާރުކުރުމަށް ބޭނުންކުރެވޭ ތަކެތީގެ އިތުރުން ތައްޔާރު ކުރެވޭ ގޮތުގައި ހުރި ކޮންމެވެސް ވަރެއްގެ ތަފާތުތަކެއްގެ ސަބަބުން ރަހައިގައި ވެސް އެ ތަފާތު ހުރުމާއިއެކު ހދ.ނޮޅިވަރަމް އަޅި ބޯކިބާ ހާއްސައީއެވެ.
ނޮޅިވަރަމުގެ ދުވަސްވީ މީހުން ބުނާގޮތުން އެ ރަށުގައި އަޅި ބޯކިބާ އަޅާތާ މިހާރު 150 އަހަރަށް ވުރެ ގިނަވެދާނެއެވެ. މިއީ ނޮޅިވަރަމުގައި ދިގު ތާރީޚެއް އޮތް ކެއުމެކެވެ.
އަޅި ބޯކިބަލަށް ބޭނުންވާ ތަކެތި
- ހަނޑޫ ފުށް
- ކާށި ހުނި
- ވަޅޯމަސް
- ފިޔާ
- ލޮނުމެދު
- އިނގުރު
- ހިކިމިރުސް
- ލޮނު
- ދިރި
- ރީނދޫ
- ފެން
ރޭގަނޑު ހަނޑޫފެނުލާފައި ބެހެއްޓުމަށް ފަހު ދުވާލުވުމުން އެ ހަނޑޫތައް ހިލަ ދައިގައި ފުނޑައި ހަނޑުލުފުށް ތައްޔާރު ކުރާނީއެވެ. އެއް ނާޅި ހަނޑޫފުށަށް ބޮޑު ކާއްޓެއްގެ ހުނި ބޭނުންވާނެއެވެ. ވަޅޯމަސް ބަހައްޓަން ވާނީ ތުނިކޮށް ކޮށާފައެވެ. ލޮނުމެދާއި އިނގުރު ބަހައްޓާނީ ގާނާފައެވެ. ދިރިއަޅައި ހިކިމިރުސް ތައް ވެސް ބަހައްޓާނީ ހިލަ ދައިގައި ފުނޑާފައެވެ.
އެއަށްފަހު ކޮށާފައި ހުރި ފިޔަލާއި ގާނާފައިވާ ލޮނުމެދާއި އިނގުރާއި ކޮށާފައިވާ ވަޅޯމަސް ބޮޑު ތައްޓަކަށް އަޅައި ރަނގަޅަށް މޮޑެ އެއްކުރާނީއެވެ. އެއްކުރަމުންދާއިރު ފުނޑާފައި ހުރި މިރުސްގަނޑުން ރަހަލާވަރަށް މިރުސް އަޅަން ވާނެއެވެ. އަދި ކުލަވާވަރަށް ރީނދޫއަޅައި ލޮނުލައި ލޮނުރަހަ ހެޔޮވަރު ކުރަންވާނެއެވެ.
އެއަށްފަހު ތައްޔާރު ކޮށްފައިވާ މަސްގަނޑުގެ ތެރެއަށް ހަނޑޫ ފުށާއި ކާށި ހުނި އަޅައި ފެންފޮދެއް އެޅުމަށް ފަހު ރަނގަޅަށް އެއްކޮށްލާނީއެވެ. އެ ތަކެތި އެއް ކުރުމަށް ފަހު ވެސް ލޮނު ހެޔޮވަރު ކޮށްލަން ވާނެއެވެ. އޭރުން އެ ހުރީ އަޅި ބޯކިބަލުގެ މަސްގަނޑު ތައްޔާރުކޮށް ނިމިފައެވެ.
އަޅި ބޯކިބާ ފިހުމަށްޓަކައި ކެޔޮފަތުގެ ދެ ހުނގުލި ބޭނުންވާނެއެވެ. ބޯކިބާ ފިހަން ބޭނުންވާ ތެލީގެ ތެރެއަށް ކެޔޮފަތު ދެ ހުނގުލި ފެއްތުމަށް ފަހު ބޯކިބާގެ މަސްގަނޑު އޮއްސާލައި އަޑިޔަށްލީ ހުނގުލި ބޯކިބަލުގެ މަތިން މަޅާލައި އޭގެ މައްޗަށް އަޅި އަޅައި އުނދުން މައްޗަށް އުދާނީއެވެ. ދަށުގައި ބޮނބި ނުވަތަ ނާށިފަދަ އަނގުރު އަލިފާން ބަހައްޓާ ފަދައިން ކެޔޮފަތުގެ މައްޗަށް އެޅި އަޅި ފަށަލައިގެ މައްޗަށް ވެސް އަނގުރު އަލިފާން އަޅަން ވާނެއެވެ. މައްޗަށް އަޅާ އަލިފާން ނިވެން ކައިރިވުމުން ދެވަނަ ފަހަރަށް އަލިފާން އަޅަން ވާނެއެވެ. މިގޮތައް ތިންފަހަރު އަލިފާން އެޅުމުން އަޅި ބޯކިބާ އޮންނާނީ ފިހެވިފައެވެ.
ނޮޅިވަރަމުގައި އަޅި ބޯކިބާ ބޭނުން ކުރަމުން އަންނަ މަޝްހޫރު ގޮތަކީ ހަވީރު ފިހަންލާ ބޯކިބާ ބަޔާންކުރެވިދިޔަ މަރުހަލާތައް ފުރިހަމަ ކުރުމަށް ފަހު އެ ކެއުމަށް ބޭނުން ކުރުމަށް ނަގާނީ ބާރަ ގަޑިއެއްހާއިރު ފަހުންނެވެ. އިރުއޮއްސޭއިރު ފިހަންލާ ބޯކިބަލެއް ނަމަ ޖެހިގެން އަންނަ ދުވަހުގެ ހެނދުނު ސަޔަށެވެ.
ޒަމާނަށް އައިސްފައިވާ ބަދަލާއެކު ދައިމަތީ ފުނޑާތަކެތި މިހާރު ބޭނުންކުރާނީ މިކްސަރުން މުގުރައިގެންނެވެ. ބޯކިބަލުގެ ރަހަ ތަފާތު ކުރުމަށް ބައެއްކަހަލަ އައު ތަކެތިވެސް ބޭނުން ކޮށްފާނެއެވެ. ނަމަވެސް އަޅި ބޯކިބަލުގެ ހާއްސަ ކަމަކީ އެ ފިހެވޭގޮތެވެ. ފިހަން ބޭނުންކުރާ ޓެކްނިކްގެ ސަބަބުން ރަހައަށް އަންނަ ބަދަލެވެ. މީރުކަމެވެ.
